.. ..
ـ تنوض فالليل تنوض صبح تلقــــــاهم مــــزال نــايضين
يقـــولوا كلام مــــا يصلح عليــــنا حنــــا الجــزايريين
ـ ما خــــلاّوا لا لــــرواح لا لمــــوتـــا ولا لحــيـين
ماخــــلاّو حــــاجة تصلح علام ، تاريخ أو حتى دين
ـ قبل ما نبدى.. نقـول الصح مـــــاشي قـــــاع المصريين
انمــــا قــصدي الجــيــّاح الـــي مـــاشي متـــربيين
ـ قالـــوها نـــاس لبــارح القــوافــل يكونوا جـــايزين
او التـــافه يبـــــــقى يضبح مع احترامـــاتي اللــخرين
ـ يا ربي نطـــــلب السمـاح عرب و خاوة ومسلــــــمين
ماشي معناه نضربوا النـح و يحسبــــوا رانـــا خايـفين
ـ ودرك خلاص لقــدر طـاح وهـوما مـــزال امصممين
ما حبّــوش يطلبوا سماح اعــلى خــــاطر مغرورين
ـ وماشي هــاذاك هـو الصـح العـيـب والـخصارة ساهلـــين
بــاش تكـون نـــاس ملاح الّي صعيـــــبة يــا مسكيـن
ـ ماراحـش انقولك ارواح بــــاش تعـرف الجزيريين
على خاطر تعرف الصـح نتايا كثر من وحـدوخرين
ـ نتم عــــاونتونـا بــالسلاح على كــــل حال مشكورين
وحنايا بعثنالكم ... أرواح راهــــم عنـــــدكم مدفونين
ـ او فاللّــــخر كل شي راح على جـــال كأس العالمين
خــــاطر الـي راح يفرح هومــــا الأنس والشياطين
ـ مــانيش راح نزيد جراح بيـــن الخــــــاوة المسلمين
انما ...نكـــتـــب الصح للأجيــال الّـــي طــالعين
ـ بدات لحكايا فــــالمرواح كانوا للبليــــــدة جـــايين
قـابلناهم بالافـــــــــراح وردة وردة فــــاليــــدين
ـ وادينـــــاهم كي السياح بالشرطة والـــــعســــاسين
لتم عرفونا نــاس ملاح وبلي حنـــــايا شبعــــانين
ـ ومربيين تاع الصح وحتــى فلعبـــــنا فنــــانين
الاهداف كانوا صحـــاح او فــــي ثلاثة شـــرعيين
ـ لتم بعدا بدينا لفراح وبتــــنا كـــــامل سهرانين
وهـــوما لتم بداوا النواح وحلفوا ماراهم ساكــتين
ـ بداوا يسبوا ضربنا النح وكنا بــــالفرحة لاتيـيـــن
وقلنا كي تبرى لجـراح يسكتــــوا رام زعفانين
ـ قالـــوا حوايـج ماتصلح او بلي مــاناش مسلــــمين
وكــأننا غلقــنا رفـــح وعــــاوننا الصــهيـونين
ـ وبلي هومـــا الي افصح وهومـا ردونــــا عربيين
وبوعمامة والأمـير صح واقيلا كانــــــوا شينويين
ـ ولحنوا نشــــــيدنا بصح نساو بلــــي الجزايريين
كانوا في وقت الكفـــــاح ومــاشي لاتيين بالتلحين
ـ لحق الوقت تاع الصح.. كنــــا لبـــلادهم رايحين
رايحين او بالنا مرتــاح على خـاطر كنا رابحين
ـ شحال من واحد منا راح ولحقوا حــتى المتغربين
كانواغير الناس لمـلاح او لعلامــــــات فاليدين
ـ عنبـالـــهم راحوا سياح للقــــــاهرة حـــــواسين
ولتم الي القنــــاع طاح حقيـــــقـــة المصــرييـــن
ـ بان البــاطل تاع الصح دارو عليـــــهم مــلايين
و الي مـاعندوش سلاح عنـــدو حـــجرة فــــاليدين
ـ وزادو غد منداك صباح الحـــافلة تـــاع اللاعبين
الطوب او لحجـر تلاح سجّلوا ربعة مصـــــابين
ـ بعــيـنيـــنا شفنا لجراح او شـــافوها الناس كاملين
اوهوما وجوههم صحاح قالــــك لالا كــــذابيــن
ـ راهــم يلعبــوا المسرح جرحوا رواحهم باليــدين
او بلعـــــاني دمهم ساح على خــــاطر راهم حابين
ـ يلعبــوا في كاش مراح مزّيـــا كانوا المـــراقبين
والفيلم كــــامل اتنفضح او شــــفنـاه كامل بالعين
ـ و زادوا جـابولنا براح وجابوا شوّيا شطـاحين
وبقاو ايغنوا للصبــاح الليـلة مــاكمش راقـدين
ـ وصباح ربي يـــا فتّـاح كنّـــا للمــلعب رايحين
دورونا حتى الليل طاح والله ماكــــــــم متدربين
ـ لحق النهـــار تاع الصح الشبــــــان دخلوا خايفين
تسمع حــي على الكـفـاح ميـــات آلف ولا زايـديـن
ـ من لخوف مطمورطاح او زيـاني تقــوشي مقنين
حتى وليد بـــاش جراح حليـش زاد خرج مسكين
ـ او سعدان ضارب النح واش بيــــهم المصريين؟
واقيــــلا عمبالهم صح راهم فالثـــلاثة وسبعين
ـ زاد كمّل المورال طاح سجلوا فالدقــــــايق لولين
زادوا فاللخريـن وصبح لحســـابـــات متسـاويين
ـ ماعليش الامل ما راح او مـــازال رانا رايحين
نلعبوا فأرض الصلاح كيـما حنــــــايا مؤمنين
ـ فالسودان يبـان الصح لهدرة لتـــــما فالرجلين
ماشي في لمواس وسلاح يـا مصاروا يا حقارين
ـ بــوتفليـــقة لتم صـرّح ابعثــوا المشجـعين
بلا تذكـرة روح ورواح والتأشيـرات امنحــيـين
ـ لتم شحال من واحد راح شباب كـــامل امعــولين
الجزاير اولاش السماح يا سعدان رانــــا جايين
ـ والفريق ما حبش يرتاح قالك ما نكونوا مهنيين
حتى نشوفوا بلي صـح خرجنا من مصر سـالمين
ـ لحقوا لأم درمان صـبح لقــاوهم كـامل مستنيين
فيديهم رافديـن لــواح ادخــلوهــــا آمنيـن
ـ وان تو تري في كل مراح وعلى علامنا متداربين
خاطر عارفين بلي طاح عليه مليون ونص حرين
ـ ولتما الفريـق ا رتاح وريحـــنا حنايا كامليـــن
السودان زاهية للصباح تســــــاند فالجزايـــريين
ـ وفالقاهرة النـاس تشطح الغلابــــــا لمســاكيـــن
ضـربـوهم كـامل بلّـواح او سمحـــوا فـيـهم كاملـين
ـ وخيّرو تاوع المسرح الفنــانـــات والفنـــانين
الي كانـت بكري تشـطـح جـــات تمـثل المصريـين
ـ واش من لبسة وروايــح جـــايين كامل فرحــانين
لمـساكـن عمبـالهـم صح للمونـديـال راهـم رايحـين
ـ وجمال عوّل يترشـح للانتخابات الجـــايـين
عمبالو خــلاص ربح وحط علاء ذراع ليميـن
ـ ارواح للسـودان ارواح لحقوا صابو الجزيريين
فكل طريق فكــل سطح دنيا خضرة شمال ويمين
ـ وزيد الوخدة تاع الصح أمعاهم حتــــى لخـــرين
هذا يغنـــي هــذا يشطح وان تــو تري سودانيين
ـ بعدا الحكّـم غير سرّح بديـــــناهم واحـــد اثنين
حـبو يزيدو يـقضو صلاّح يسجـلــوا فالدقـايق لـولـين
ـ قال مادام قاواوي راح نربـــحوهم بكــاش ثنين
حـــاولوا يهجموا بصح البنطـــاقي طالــع منـين
ـ شاوشي فكرنا فسرباح وين يـــا مـش مهنـدسين
و بوقرة مكـاش السمـاح حبسوا هنايـا ويـن رايحـين
ـ او زيـــاني بدى يطرح او مقني زيــــن الــــديـن
إمـا جـــاز ولا طاح ولا مــــا بيـــن الرجـلين
ـ حليش حي على الكـفاح فكــــرني فــــــالمجاهدين
او غــــزال لـعبـوا يـفرح مـن أخـــــطر المهاجمـين
ـ ويـبدة مازال ما صرّح ومازال سـرارو امخـبـيـين
او بالحاج أيـــــلا طرّح تقول التوربو فــالرجلين
ـ ومنصـوري قايد ناجح او يـــا بزاز يـــا ياسين
او صايفي ما فـرا يـشطح ولا يــروح شمال ويمـيـن
ـ أيـراوغ ....اويشبّـــــح ويـــــزيد يمرر الخرين
عنـتر يحـيى ويـن رايـح ؟؟؟ بـووووووووم فالـتسـعـين .
ـ فريـقنا الوطـــــني ربح كيفاش نوصف ذاك الحين
الجزاير زاهية للصبـح تفكــــرنا الثنيــن او ستين
ـ وفي مصر بدى المسرح بداو يعيـطوا الكـــــذابين
راهم صــاريين المذابح بالمطــــاوي والسكــاكين
ـ وهو فلوتـــال مريّح امسلمين و امكتـــفين
في حياتي شفت الجـواح ماشي كيــــما المصريين
ـ نشكر كل واحــد روّح كامـــــل المشجــعيـن
دركـا عرفـوا تـاع الصـح شكـون هوما الجزايـريـيـن
ـ ونشكر كل مــن ريّح فكــرســـي الاحتياطيين
كـل واحد فيــهم يصلح او ليّـام راهـــم جـايين
ـ و روراوة الــي صلّــح صـــورتنا فـــالميادين
وفاللخر عــمّــــي رابح سعدان شيـــخ المدربين
ـ او فيصل كرشوش صح ماعطاش ربي فالرجلين
بصح مايضـــربش النح على خاوتوا الجزايريين
الثلاثاء فبراير 02, 2010 3:58 pm
